ඇත්තට ම මේ තරම් පාදඩ මට්ටමට ජනමාධ්‍යවලට පත් වෙන්න පුළුවන් ද? පුළුවන් බව තමයි ක්රියාවෙන් පෙන්නුම් කරන්නෙ. ස්ත්රී දූෂණයක්, ස්ත්රී අපයෝජනයක් සිදු වූ බොහෝ අවස්ථාවල ජනමාධ්‍ය ඒ සිද්ධිය වාර්තා කරන්නේ තවත් වරක් ඒ විපතට පත් වූ තැනැත්තිය දූෂණය කරමින් බවයි මගේ නම් අදහස. මේ තුට්ටු දෙකේ වාර්තාකරණයට නැතුවම බැරි වචන මාලාවකුත් තියෙනවා. සුරූපිනිය, සුරූපී කාන්තාව, සුරූපී තරුණිය … ඔය ආදී වශයෙන්. ඒ ගැටලුවට මැදි වූ තැනැත්තියගේ සකල සියලු අනන්‍යතාවන් වෙනුවට හුවා දක්වන්නේ ඇය සුරූපිනියක් වූ බවයි. තව පුළුවන් නම් අදාළ සිද්ධියත් පියවරෙන් පියවර සිදු වුණු අන්දම අතින් හදලා හරි ලියන්න පසුබට වෙන්නෙත් නැහැ. ඊට ම සරිලන පරිදි අදාළ තැනැත්තියගේ අඟපසඟත් කෙළ පෙර පෙර විස්තර කරනවා. පුළුවන් නම් කෙළින් ම ඇයගේ මුහුණේ ඡායාරූපයක් ම පළ කරලා “වාර්තාකරණය” කුළුගන්වනවා. මේවා කියවන එකත් මහ බඩ දඟලන වැඩක්.

දැන් ටික කලක පටන් විමල් වීරවංශගේ මාගම් සෝලිය ගැන ඉරුදින පත්තරේට ලියන උදවියත් අනුගමනය කරන්නෙ මේ චර්යාව මයි. හෙට(ඉරිදා) පත්තරේ මුල් පිටුවේ අදාළ ගැටලුවට මැදි වූ තැනැත්තිය මාධ්‍යවේදිනියක් වූ බව පවා නොතකා ඇයව පුන පුනා හඳුන්වන්නේ “සුරූපී තරුණිය” “සුරූපිනිය” කියලයි. පාඨකයා වෙනුවෙන් අසභ්‍ය චිත්රපටයක් අධ්‍යක්ෂණය කර දීම මේ ඊනියා මාධ්‍යවේදීන් භාරගෙන තියෙන බවකුයි පේන්නෙ. මෙතන ඒ ස්ත්රියට සිදුවූ අසාධාරණය වෙනුවෙන් ඒ පාර්ශ්වය ගැන ලේශමාත්ර වූ හෝ සහානුභූතික හැඟීමකින් කරන වාර්තාකරණයක් ඇත්තේ නෑ. ඔවුන්ගේ එක ම අරමුණ හැකි තාක් කුණු රසය අවුස්සා විමල් වීරවංශට පහර දීම සඳහා ඒ අපයෝජන සිද්ධිය යොදාගැනීම බවයි පේන්නේ. ‍ඒ වගේ ම පත්තරේ අලෙවියත් මේ වගේ කුණු කතා මත ම රඳා පවතින බව දන්නා නිසා ම දෝ ඔවුන් ඒවා පළ කරන්නෙත් “තව තියෙනවා හැබැයි ඒවා ලබන සතියේ” කියමින්! හැකිතාක් දීර්ඝ කාලයක් තිස්සේ මේ කතාව අද්දා, දිග්ගස්සා, උපරිම රසාස්වාදය ලබා දෙන බවට තමයි ඒ පොරොන්දුව. හරියට කොටස් වශයෙන් ටෙලි නාට්‍යයක් පෙන්නනවා වගේ. විමල් වීරවංශ කළ අපයෝජනවලට නොදෙවෙනි අපයෝජනයක් මේ “වාර්තාකරණයෙනුත්” සිද්ධ වෙන්නෙ නැද්ද?

UPDATE : මේ ගැටලුව පසුව විසඳාගනු ලැබුවා.

අද මම පළවෙනි වතාවට වෙනත් තැනක පරිගණකයකින් මගේ බ්ලොග් එක දිහා බැලුවා. මට පෙනු‍ණේ එච්චර සතුටුදායක දර්ශනයක් නම් නෙවෙයි. මම හිතුවේ යුනිකෝඩ් සිංහලවල තිබුණු “පිල්ලම් දෝෂ” දැන් හරිගස්සලා කියලයි. එත් එහෙම නෑ. මම ගෙදර පරිගණකයෙන් නරඹද්දී නම් කොම්බුව වගේ අකුරකට කලින් යෙදෙන පිල්ලම් සාමාන්‍ය පරිදි අදාළ අකුරට කලින් දර්ශනය වෙනවා. ඒත් අද මම දැක්ක හැටියට නම් හැමෝටම ඒ අන්දමට සිංහල දර්ශනය වෙන්නෙ නෑ. මේ බ්ලොග් එකේ නම පවා තවමත් පේන්නේ වබේ ආලෝචනා හැටියට(වෙබ් ආලෝචනා හැටියට නෙමෙයි) (It is displayed as Wabe Alochana instead of Web Alochana because kombuwa is displayed after “Wa yanna”)

මම character encoding හරියට තියෙනවද කියලත් පරීක්ෂා කළා. ඒ ඔක්කොම හරි. ඒත් සිංහල තවමත් දර්ශනය වෙන්නේ මහ අභූත විදිහකට නේ! මේක සාමාන්‍ය තත්වය ද එහෙමත් නැත්නම් මම අද පාවිච්චි කරපු පරිගනකයේ වැරැද්දක් ද? එහෙමත් නැත්නම් අකුරකට අදාළ සියලු පිල්ලම් දර්ශනය වෙන්නේ අදාළ අකුරට පසුව වීම සාමාන්‍ය දෙයක් ද? එහෙම නම් මගේ පරිගණකයේ ඒක නිවැරදි ව දර්ශනය වෙන්නත් සමහර වෙනත් පරිගණකවල විතරක් වැරදියට පෙනෙන්නත් හේතුව මොකක්ද?

ගිය සතියේ දවසක මම බම්බලපි‍ටිය කිට්ටුව සංයුක්ත තැටි විකුණන තැනකට ගොඩ වැදුණා තැටි කීපයක් ගන්න. එතන ඉන්න අතරේ පාසැල් සිසුන් කීප දෙනෙක් ඇවිත් අහනවා “රේ” මැගසින් එක තියෙනවද? කියලා. මම හැරිලා බැලුවා මොකක්ද මේ සඟරාව? එතන හිටපු අලෙවිකරුවා ඔවුන්ට දුන්නේ සී.ඩී එකක්. එතකොට ම මම දැක්කා පෝස්ටරයක්, කවුන්ටරයට යටින්. “පිටු පෙරලන්නෙ නැති, පිටු ඉරෙන්නෙ නැති, භාවිතයට පහසු ලංකාවේ පළමු වරට පරිගණක තැටියක් මගින් පළ වන මාසික සඟරාව”

“ෂා අලුත් වැඩක් වගේ නේ ද?” මම ඇහුවා.
“ඔව්, මේක මේ ජනවාරිවල ඉඳලා එන්නෙ” ඔහු උත්තර දුන්නා‍.
“හොඳද?”
“හොඳද කියලා අහනවා, මෙතන විතරක් සීයකට වැඩිය විකිණෙනවා”

මේ කතාව අහපු මමත් සඟරාවක් අරන් බලන්න කල්පනා කළා. ඒත් ඒ වෙනකොටත් අප්රේල් කලාපය විකිණිලා ඉවරයි. මාර්තු කලාපයෙන් එකක් විතරක් ඉතුරු වෙලා තිබුණා.

මේ සඟරාව ලංකාවේ පරිගණක අධ්‍යාපනයේ තත්වයත් එක්ක සංසන්දනය කරලා බලද්දී අතිවිශිෂ්ට ව්‍යායාමයක් ම වන බව අවධාරණය කළ යුතු යි. ශ්රව්‍ය, දෘශ්‍ය මාධ්‍ය දෙක ම උපයෝගී කරගනිමින් රසවත් ව, සරල බසින් පරිගණක අධ්‍යාපනයට අදාළ දෑ මෙන් ම ඊට පරිබාහිර දෑත් ඉදිරිපත් කර ඇති අන්දම ප්රශංසනීයයි. පරිගණක අධ්‍යාපනයේ දී හා සන්නිවේදනයේ දී පැන නගින භාෂා ගැටලු ජය ගැනීමේ ඉක්මන් ක්රමයක් තමයි ශ්රව්‍ය දෘශ්‍ය ආධාරකයන් සහිත ව ඉගැන්වීම. මේ සඟරාවේ තිබෙන සෑම පාඩමක් ම පාහේ වීඩියෝ නැතහොත් ඕවියෝ මාධ්‍යයෙන් සිංහල බසින් ඉදිරිපත් කෙරෙනවා, අවශ්‍ය තැන්වල ඉංග්රීසි භාෂාව ද යොදාගනිමින්. විෂුවල් බේසික්, ඩ්රීම් වීවර්, ෆ්ලෑෂ්, කොරල් ඩ්රෝ, ජාවා ඇතුළු පුළුල් පරාසයක විහිද යන පාඩම් මාලා ගණනාවක් ම මෙයට ඇතුළත්. ඊට අමතර ව චිත්ර කලාව, කලා ඉතිහාසය, සිංහල වැනි විෂයයන්ට අදාළ සන්නිදර්ශන සහිත ලිපි මාර්තු කලාපයේ තියෙනවා. කුමාරතුංග මුනිදාසයන් ගැන තිබෙන ශ්රව්‍ය-දෘශ්‍ය ලේඛනය සම්පාදනය කර තිබෙන්නේ පොදුවේ කවර පාඨකයකුට වුව ද වැදගත් වන අන්දමින්. ඒ වගේ ම තමයි අධිකරණ වෛද්‍ය විද්‍යාව, සංගීතය ආදිය ගැන පළ වී ඇති දේත් - හරි ම රසවත්, ඒ වගේ ම විධිමත්.

ඒත් මේක හුදෙක් පාඩම් මාලා එකතුවක් විතරක් නෙමෙයි. නව ලොව පුවත්, පරිගණක ක්රීඩා ආදිය, විනෝදාස්වාදනය, සංගීතය වැනි අංශයන්ටත් විහිදුණු පිටු මෙහි අන්තර්ගතයි. සඟරාවක් හැටියට ආකෘතිය අතින් විශිෂ්ටයි. මම මේ අන්තර්ගතය කොන්දේසි විරහිත ව වර්ණනා කරන්නෙ නෑ, එය තවත් දියුණු විය යුතු යි. ඒත් මේක පුරෝගාමී වැඩක්. එවැනි දේවල් දිරිමත් කළ යුතුයි. පරිගණක අධ්‍යාපනය දියුණු කරන බවට කයිවාරු පමණක් ගහන ආණ්ඩුවේත් අධ්‍යාපන අමාත්‍යාංශයේත් ඇස් අරවන වැඩක් මේක.

කවරයේ දැක්වෙන අන්දමට ඔවුන්ගේ ලිපිනය :
www.vectronics.net/ray (නමුත් මෙය පළ කරන මොහොතේ /ray කොටස වැඩ කළේ නෑ)

raymagit at gmail dot com

Vectronics Electro Systems (pvt) Ltd,
54/13 Pepiliyana Road, Nedimala,
Dehiwala, SRI LANKA

එදා රෑ…

දැවැන්ත රූපවාහිනී තිරයක දිගහැරුණු ලෝක කුසලාන ක්රිකට් සැණකෙළිය(ශ්රී ලංකාවේ සැබෑ ජාතික ක්රීඩා උළෙල) රෑ එළි වන තුරු ආස්වාදය කළා. කවදාවත් - ගෙදරදී වත් - ක්රිකට් නොබලන අයත් මෙන්න එතන! මුළු කොළඹ ම අවදියෙන් ඉන්න බවක් පෙනුණා. ශ්රී ලංකාව, නවසීලන්තය පරාජය කළේ ඔවුන් ආධුනිකයින්ගේ මට්ටමට ඇද දමමින්. සව්දිය පිරුණා. එස් එම් එස් හා දුරකථන පණිවිඩ නිමක් නැතුව ඔබ මොබ ගියා. නිදා සිටියවුන් අවදි කෙරුණා. පාන්දර මහ පාරේ “ශ්රී ලංකා කොල්ලො වසයි” ගීතය හාත්පස දෙවනත් කරමින් රැව් පිළිරැව් දුන්නා.

“එක පාරක් අපි දුන්නා බැටේ
මේ පාරත් අපි දෙනවා බැටේ…”

28 වෙනිදා රෑ කොහොම තියෙයිද!